Најновото засилување на Кит Го, поранешниот младински репрезентативец Бојан Ѓорѓиевски веќе активно се приклучи на подготовките на тимот во Анталија.
Ѓорѓиевски го пропушти првиот дел од подготовките, но секако очекува максимално да биде подготвен за пролетниот дел од шампионатот.
„Среќен сум што доаѓам во клуб, организациски поставен на највисоко професионално ниво, поради што воопшто не размислував кога пристигна понудата. Верувам максимално ќе се вклопам во тимот соодветно одговарајќи на амбициите за највисок пласман во пролетниот дел од сезоната“ – вели 28-годишниот Ѓорѓиевски по пристигнувањето во редовите на Кит Го.
Бојан Ѓорѓиевски, кој потекнува од фудбалската школа на Вардар, покрај за најтрофејниот македонски клуб има настапи и за Металург, Победа, Работнички и Хоризонт Турново на домашната сцена, како и за белорускиот БАТЕ Борисов, летонската Сконто Рига, бугарскиот Нефтохимик, српскиот суперлигаш Мачва како и албанскиот прволигаш Теута. Последен негов клуб беше Шкупи од каде сега се сели во Кит Го.
Кит Го денеска од 13:30 часот го очекува и третиот пријателски натпревар за време на подготовките во Анталија, против данскиот ХИК.
