Шкендија подобра од Работнички, славеа и Брегалница, Академија Пандев и Скопје

Актуелниот првак Шкендија го совлада Работнички со 2-0 и ја продолжи потерата по лидерот Шкупи. Лошиот старт малку го забави тетовскиот тим, но сега фудбалерите на Шкендија влегоа во посакуваниот ритам.

Дашмир Елези во десеттата минута го искористи невниманието во одбраната на „романтичарите“ и донесе водство, а Флорент Рамадани во 65.минута го потврди триумфот.

Академија Пандев го разочара Јане Николоски на дебито за Борец. Струмичкиот тим оствари победа (1-2) во Велес. Мартин Мирчевски во 32.минута донесе предност, Борец израмни преку Крста Ѓорѓевиќ во 64.минута, но Николче Шаркоски постигна победнички гол за „пандевци“ во 87.минута.

Брегалница беше убедлива на гости против Пелистер и славеше со 0-3. Тренерот Марјан Секуловски немаше милост за „своите“ битолчани. Мартин Стојанов од пенал го отвори резултатот во 36.минута, а потоа постигна и втор гол во 74.минута. Третиот погодок беше дело на Стефан Коцев во 90.минута.

Ален Јашароски во судиското продолжение му донесе триумф (2-1) на Скопје против Тиквеш. Напаѓачот погоди во 92.минута за победа и три бода. Претходно тој и го отвори резултатот во 25.минута, а Тиквеш израмни преку Роберт Коцев од пенал во 49.минута.

Македонија ЃП и Струга ТЛ одиграа 1-1 во Ѓорче Петров. Марио Младеновски со удар со глава донесе предност за „лавовите“ во 68.минута, но Дејан Цветаноски израмни само девет минути подоцна.

Вчера, Шкупи ја совлада Ренова на Чаир со 2-1.

ПРВА ЛИГА, 11 КОЛО – РЕЗУЛТАТИ

ШКЕНДИЈА – РАБОТНИЧКИ 2-0

ПЕЛИСТЕР – БРЕГАЛНИЦА 0-3

СКОПЈЕ – ТИКВЕШ 2-1

МАКЕДОНИЈА ЃП – СТРУГА ТЛ 1-1

БОРЕЦ – АКАДЕМИЈА ПАНДЕВ 1-2

ВЧЕРА: ШКУПИ – РЕНОВА 2-1