Менаџерот на Манчестер Сити, Пеп Гвардиола, очекува Ерлинг Халанд да продолжи со својот развој и да прикаже уште подобри игри во наредниот период. Кариерата на Норвежанецот во клубот започна фантастично и тој постигна 13 гола во првите девет натпревари за „граѓаните“.
„Тој е неверојатен напаѓач, тоа сум го кажал многу пати. Но, на возраста на која е, тој е амбициозен, сака да се подобрува и мислам дека ќе биде подобар. Тој ги имаше квалитетите и пред да дојде кај нас. Тој само го задржува континуитетот од она што го правеше и претходно“, изјави Гвардиола.
Халанд ќе има шанса да ја зголеми бројката на постигнати голови утре кога Манчестер Сити гостува кај Вулверхемптон. Гвардиола истакна дека неговиот тим нема да го потцени противникот.
