Тренерот на Баер Леверкузен, Чаби Алонсо, зборуваше по реваншот од четвртфиналето на Лигата на Европа со англискиот тим Вест Хем. Натпреварот заврши нерешено 1-1, што значи дека „аспирините“ одат напред меѓу четирите најдобри.
И покрај овој значаен успех, тренерот беше повеќе критичен отколку позитивен.
„Се подготвувавме за опција во која Вест Хем ќе нѐ притисне многу силно. Не ни беше многу удобно да играме во нашата формација. Да бидам искрен, во првото полувреме противниците беа подобри и не се чувствувавме комфорно. Многу е важно што не примивме втор гол бидејќи тие дефинитивно одиграа подобро од нас. За среќа, по паузата ги свртевме работите. И мило ми е што продолживме понатаму. Секогаш има тешки моменти во Лига Европа“, изјави Чаби Алонсо.
Во полуфиналето, фудбалерите на Баер Леверкузен ќе се соочат со Рома во реприза на минатогодишната битка во оваа фаза од турнирот. Тогаш римјаните излегоа како победници.
