Менаџерот на Манчестер Јунајтед, Ерик тен Хаг може да остане на кормилото на англискиот клуб и во следната сезона, пренесува „The Athletic“.
Според изворот, раководството на клубот, главно во лицето на новиот косопственик Сер Џим Ретклиф, има намера да го задржи 53-годишниот Холанѓанец следната година. Новите сопственици на Манчестер Јунајтед веруваат дека отпуштањето на Тен Хаг и барањето нов стратег ќе бара и дополнителни инвестиции.
Во информацијата се наведува и дека ИНЕОС ја идентификувал и вистинската причина за тешкотиите на Тен Хаг, која лежи во претходното раководство на клубот, кое не успеало да обезбеди добри основи за неговиот успех во Манчестер Јунајтед.
Тен Хаг е на чело на Манчестер Јунајтед од летото 2022 година, освојувајќи го Карабао купот и завршувајќи во Топ 4 во својата прва сезона. Сепак, „црвените ѓаволи“ беа исфрлени во групната фаза на натпреварувањето оваа сезона, а тимот се наоѓа на шестото место во Премиер – лигата со 54 бода од 34 натпревари и нема да успее да се квалификува за Лигата на шампионите следната година.
Сепак, Манчестер Јунајтед ќе има шанса да освои трофеј со оглед дека во финалето на ФА Купот ќе игра против градскиот ривал Манчестер Сити.
