Нејтан Аке беше можеби најимпресивниот играч во тимот на Пеп Гвардиола на синоќешниот дуел против Арсенал во ФА купот на Англија. Тој беше одличен во одбраната, а го постигна победничкиот гол (1-0) што ги исфрли „топчиите“ од натпреварувањето.
Менаџерот на Манчестер Сити, Пеп Гвардола, го пофали својот дефанзивец што го запре еден од најопасните играчи на „топчиите“, Бакајо Сака, и ја поздрави неговата упорност и покрај тоа што долго време беше во немилост.
„Каква сезона има Нејтан Аке. Тој го контролираше еден од најтешките противници во Премиер – лигата бидејќи Сака е во неверојатна форма. Тој е и извонреден човек, затоа што имаше период кога не играше и ниту еднаш не се пожали“, изјави Гвардиола.
Аке е редовен стартер за Манчестер Сити од рестартот на сезоната по Светското првенство во Катар, настапувајќи на девет од десетте натпревари што ги одигра тимот.
