Менаџерот на Арсенал, Микел Артета, изјави дека неговиот тим мора да го подигне нивото во првенството, бидејќи веќе ни второто место не е сигурно. Лондонскиот тим одигра две последовни нерешени средби, што му овозможи на Њукасл да се доближи на само четири бода.
„Наш приоритет сега е да победуваме натпревари во Премиер – лигата. Бевме во многу подобра позиција, но последните две ремија значително го променија тоа. Треба да му честитаме на Њукасл за формата во која се наоѓаат и начинот на кој играат. Ние мора да го подигнеме нивото и да почнеме да победуваме“, изјави Артета.
Арсенал гостува кај Ипсвич во недела и, доколку загуби, Ливерпул може да стане шампион уште овој викенд.
„Мора да победиме за тоа да не се случи“, додаде менаџерот по тој повод.
Тој ги коментираше и претстојните натпревари од полуфиналето на Лигата на шампионите против Пари Сен Жермен.
„Мојата лична желба е секогаш да бидеме домаќини на реваншот, но таква е ситуацијата. Треба да видиме какви предности и можности ни нуди тоа. Ако гледавте фудбал вчера, знаете дека реваншите во европските вечери се лудило – сè може да се случи“.
