Европскиот клупски првак Реал Мадрид има потреба од победа со најмалку три гола разлика во реваншот против Арсенал во четвртфиналето од Лигата на шампионите, доколку сака да се пласира во полуфиналето на турнирот или барем да го одведе вечерашниот дуел на „Сантијаго Бернабеу“ во продолженија.
Мадриѓаните се соочуваат со оваа тешка задача откако минатата недела загубија со 0-3 на гостувањето во Лондон. Иако во последните години „кралевите“ направија неколку спектакуларни пресврти во елиминациската фаза од турнирот, овојпат предизвикот е уште поголем. Не само што Реал Мадрид мора да надополни негатива од три гола, туку и Арсенал не примил толку многу голови на еден натпревар речиси година и пол, истакнуваат англиските медиуми.
Последен пат „топчиите“ примија најмалку три гола при победата од 4-3 на гости кај Лутон во натпревар од Премиер – лигата на 9 декември 2023 година. Оттогаш, Арсенал одигра вкупно 79 натпревари во сите натпреварувања, при што оствари 31 натпревар без примен гол, прими по еден гол на 34 натпревари, а на останатите 14 доби по два гола.
Од друга страна, само оваа сезона Реал Мадрид има 23 натпревари во кои постигнал најмалку три гола во регуларното време, вклучувајќи 7 од 13-те натпревари во Лигата на шампионите сезонава.
