Македонскиот фудбал денеска ја прими една од најтажните вести во последните години. На само 21 година згасна животот на Виктор Боневски, млад и талентиран фудбалер кој со месеци се бореше со тешка болест – малигна неоплазма на абдоменот. Иако ја водеше својата најважна битка со огромна храброст, за жал, неговото срце престана да чука.
Тажната вест беше потврдена од неговиот матичен клуб, фудбалската академија Њу Старс, местото каде што Боневски ги направи своите први фудбалски чекори и остави неизбришлив белег.
„Со длабока тага и неверување ја примивме веста за смртта на Виктор Боневски. ФК Њу Старс изгуби свој член, наш фудбалер и дел од семејството. Со неговата љубов кон фудбалот, посветеност и другарство, Виктор остави неизбришлив белег во нашиот клуб. Во овие тешки моменти изразуваме искрено сочувство до неговото семејство, роднините и сите блиски. Нека споменот за Виктор остане засекогаш меѓу нас, а неговата добрина и спортски дух да бидат пример за идните генерации. Нека почива во мир“, се наведува во соопштението на клубот.
Иако беше подложен на оперативен зафат и лекувања, Виктор не успеа да ја добие борбата со болеста. Сепак, и во својот краток живот остави силна трага – зад себе остави спомени на млад човек со исклучителен талент, работна етика и човечност. Неговата насмевка, неговиот спортски дух и љубовта кон играта ќе останат вечно запаметени кај сите што имаа привилегија да го познаваат.
