Нова смена на кормилото на Лацио. Марко Барони си поднесе оставка по само една сезона на клупата на „бјанкочелестите“, потврди спортскиот директор Анџело Фабијани за „Ил Месаџеро“.
Барони, кој минатото лето пристигна од Верона, реши сам да се повлече, а како причина се наведуваат „лични околности“. Иако не успеа да ја однесе екипата во Лигата на шампионите, Лацио беше конкурентен до последното коло.
„Одлуката е негова. Ние сме задоволни од сезоната – малку повеќе среќа дома и ќе игравме во Европа,“ изјави Фабијани.
Но, и без Барони, римскиот клуб не планира „рестарт од нула“. Напротив – проектот продолжува со фокус на младите таленти и задржување на клучните имиња.
„Нема распаѓање, само надградба. Овој тим има иднина“, порачува Фабијани.
Интересно е што Лацио веќе трета сезона по ред влегува во турбуленции со тренерите – минатата сезона на клупата се сменија тројца: Маурицио Сари, Џовани Мартушело и Игор Тудор.
Сега, медиумите во Италија шпекулираат со сензационално враќање на Маурицио Сари во Лацио.
