Англискиот премиерлигаш Манчестер Сити е во потрага по нов голман, бидејќи иднината на Едерсон Мораеш на „Итихад“ е неизвесна.
Бразилецот и минатото лето беше поврзуван со трансфер во Саудиска Арабија, а истото сценарио е можно и ова лето. Иако Едерсон важи за еден од најдобрите голмани во светот кога станува збор за играта со топка, сепак има подобри голмани кога се во прашање одбраните и командувањето во шеснаесетникот. Манчестер Сити сака да го продаде и истовремено да најде соодветен наследник кој дополнително ќе го засили тимот.
Изборот паднал на Диого Кошта, голманот на Порто и португалски репрезентативец. „Граѓаните“ испратиле почетна понуда од 40 милиони евра, која била одбиена од Порто. Сепак, очекувањата се дека со понуда од околу 60 милиони евра трансферот би можел да се реализира.
Кошта е дете на академијата на Порто и веќе има 249 настапи за првиот тим, како и 34 настапи за националната селекција на Португалија, иако има само 25 години.
