Манчестер Јунајтед склучи петгодишен договор со 23-годишниот белгиски голман Сен Ламенс, кој доаѓа од Ројал Антверпен за 21 милион евра плус бонуси, пренесуваат британските медиуми. Ламенс се смета за чувар на мрежата способен да ги замени Андре Онана и Алтај Бајиндир, кои имаа проблеми оваа сезона, и да стане прв голман на тимот.
Претходно, медиумите го поврзуваа Јунајтед и со голманот на Астон Вила, Емилијано Мартинез.
Оваа промена доаѓа по разочарувачките настапи на сегашните голмани. Онана беше одговорен за два гола во шокантниот пораз од Гримзби Таун во Купот на ЕФЛ, додека Бајиндир направи грешка во победата од 3-2 над Бурнли во Премиер – лигата.
„Тешко е да се биде голман на Манчестер Јунајтед во овој момент. Сѐ се случува во очите на јавноста“, изјави менаџерот Рубен Аморим минатата недела.
Ламенс од своето деби во ноември 2023 година за Антверпен одигра 60 натпревари и во 12 од нив успеа да ја задржи мрежата недопрена.
