Италијанскиот гигант Милан е заинтересиран за македонскиот репрезентативец Енис Барди. Шпанските медиуми открија дека „росонерите“ се подготвени да платат 5 милиони евра за да го добијат одличниот играч за врска до крајот на зимскиот преоден рок.
Сепак, засега нема официјална понуда пристигната на адреса на Милан.
„Можам да ви кажам дека нема никаква понуда за Барди, тоа е шпекулација. Енис е многу важен играч за Леванте и јас секако би сакал да го имам и натаму во тимот, но доколку дојде супер понуда, секако дека клубот ќе ја разгледа сериозно“, изјави тренерот Алесио Лисци.
Енис Барди има договор со Леванте до крајот на сезоната, со опција за продолжување за уште една година, но само доколку клубот успее да обезбеди опстанок во Ла Лига. Македонскиот репрезентативец на лето ќе може да избере нова средина како слободен агент.
Барди дојде во Леванте во јули 2017 година од унгарскиот прволигаш Ујпешт за 1,5 милиони евра.
