Симоне Инзаги не го криеше разочарувањето по поразот од Милан со 0-3, по што Интер беше елиминиран од полуфиналето на Купот на Италија. По ова, Милан ќе игра финале за трофејот.
„Тоа е фудбалот – мора да му оддадеме признание на Милан“, изјави Инзаги. „Жалам за нашите навивачи, кои дојдоа во голем број да нѐ бодрат.“
Тој смета дека Интер имал шанси во првото полувреме, но потоа тимот паднал.
„Во првото полувреме креиравме многу и заслуживме повеќе. Во второто примивме гол по корнер, немавме среќа, а потоа направивме многу помалку отколку во првиот дел.“
Тренерот на „нероаѕурите“ укажа и на акумулираниот физички и ментален умор на тимот.
„Мораме да ги анализираме двата порази на правилен начин. Не заслуживме да загубиме во Болоња, а против Милан останавме без енергија во второто полувреме.“
Сега фокусот на Интер останува трката за титулата во Серија А, но и полуфиналните дуели од Лигата на шампионите против Барселона.
