Фудбалерите ја стартуваа „мисијата Белгија“, потоа следи и дуел со Казахстан во Астана (ФОТО)

Фудбалската репрезентација на Македонија го одработи првиот тренинг на тренинг-центарот на Фудбалската федерација на Македонија, со што и официјално започнаа подготовките за клучните натпревари од квалификациите за Светското првенство 2026 против Белгија и Казахстан.

Овој квалификациски прозорец е особено важен, бидејќи доаѓа по завршувањето на клупската сезона, кога фудбалерите се на границата на физичката издржливост. Сепак, селекторот Благоја Милевски верува дека тимот може да даде максимум.

„Очекувам многу подобро издание отколку минатиот јуни. Знаеме дека тој период по завршувањето на клупските сезони знае да биде незгоден, но мораме да извлечеме максимум. Имаме квалитет и мотивација“, истакна Милевски.

Првиот натпревар Македонија ќе го одигра на 6 јуни против силната селекција на Белгија на националната арена „Тодор Проески“ во Скопје. Поддршката од домашната публика ќе биде од огромно значење за нашите репрезентативци.

Три дена подоцна, на 9 јуни, Македонија гостува кај Казахстан во Астана, во нов обид за позитивен резултат и чекор поблиску до Мундијалот.