Фиорентина официјално потврди дека Рафаеле Паладино повеќе нема да биде тренер на клубот. Двете страни постигнале взаемен договор за прекин на соработката, иако Паладино пред само еден месец го продолжи договорот до 2027 година.
Според италијанските медиуми, 41-годишниот стратег неочекувано поднел оставка, а клупското раководство не успеало да го убеди да остане. Така, Паладино заминува од „Артемио Франки“ по само една сезона на клупата, во која „виолетовите“ завршија шести во Серија А со 65 бодови (19 победи, 8 ремија и 11 порази).
Фиорентина со тој пласман избори четврто последователно учество во Конференциската лига, каде оваа сезона стигна до полуфиналето, што се смета за солиден успех.
Во медиумите веќе се споменуваат неколку потенцијални наследници на Паладино: Марко Барони, Стефано Пиоли, Франческо Фариоли и Даниеле де Роси.
