Даниел Мојсов: Терените во Македонија се очајни, затоа нема квалитетен фудбал

Поранешниот македонски репрезентативец Даниел Мојсов, кој во последните две сезони настапува за Тиквеш, упати јавна порака до претседателот на ФФМ, Мухамед Сејдини, истакнувајќи дека главната болка на македонскиот фудбал е лошата инфраструктура и очајните терени на кои се играат натпреварите од Првата лига.

„Почитуван претседателе, фала за вашите зборови за новата сезона 2024/25. Првпат пишувам за овој проблем, но мислам дека крајно време е да се реагира. ФФМ да ги направи фудбалските терени барем за играње натпревари како што наликува за едно првенство, но и да се одржуваат што е најбитната работа после поставување и правење терен. Мое мислење е дека досега откако имаше направено терени не се знаеше доволно да се одржуваат. Мислам дека ФФМ треба да ги преземе под своја контрола терените и да ги одржува како што наликува да биде еден фудбалски терен! Само еден или два фудбалски терени преку целата година се на едно добро ниво, а другите сѐ повеќе наликуваат на сѐ освен на фудбалски терен! Ова денес освен теренот во Струмица, сѐ друго не личеше на терен! Ова го пишувам со една добра намера за да има напредок во фудбалот во нашата држава“, објави Даниел Мојсов на социјалните мрежи.

ФФМ во изминатиот период реновираше неколку терени на стадионите ширум Македонија, но нивното одржување не беше на потребното ниво.