Фудбалерот на Тотенхем, Родриго Бентанкур, сподели позитивни информации за својата состојба по инцидентот во првото полуфинале против Ливерпул во Лига купот. Тотенхем победи со 1-0 благодарение на голот на Лукас Бергвал во финишот од мечот.
Бентанкур беше изнесен на носилки помалку од четвртина час по почетокот на натпреварот. Тој се обиде да игра со глава по нафрлување од корнер, но лошо падна и не можеше да стане. По околу осум минути, медицинскиот тим на Тотенхем го изнесе Уругваецот. Подоцна клубот соопшти дека Бентанкур е свесен, зборува и ќе биде пренесен во болница на прегледи.
„Сè што знам е дека беше свесен кога го напушти теренот и беше пренесен во болница за прегледи. Станува збор за повреда на главата, што предизвика загриженост кај играчите“, изјави менаџерот на Тотенхем, Анге Постекоглу, по завршувањето на натпреварот.
Самиот Бентанкур ги успокои навивачите преку порака на Инстаграм.
„Сè е во ред, луѓе! Ви благодарам за пораките! Честитки за победата, момци“, истакна Уругваецот.
