Навивачите на Барселона сè уште се во еуфорија по победата над лутиот ривал Реал Мадрид во Купот на кралот, а утрово ги израдува и веста дека нивниот клуб за летниот преоден рок подготвува големо засилување.
Шпанска „Марка“ објави дека челниците на Барселона работат со полна пареа околу летните трансфери и дека веќе е јасно кој ќе биде приоритет за засилување.
Барселона сака да го засили нападот и да донесе фудбалер кој ќе биде конкуренција за Роберт Левандовски, но и долгорочно решение во шпицот на нападот. Изборот паднал на Хулијан Алварез, кој ќе биде примарна цел на клубот ова лето.
Во корист на Барселона оди и фактот дека Алварез не е задоволен од ситуацијата во Атлетико Мадрид, каде што очекуваше борба за трофеи, нешто што сезонава не се случи.
Иако само пред почетокот на оваа сезона пристигна во Атлетико од Манчестер Сити, не е невозможно Алварез веќе летово да го промени клубот, а Барселона сака тоа максимално да го искористи.
Во клубот проценуваат дека Алварез сигурно ќе чини над 100 милиони евра, но веруваат дека тоа би била мудра инвестиција, со оглед дека аргентинскиот напаѓач веќе неколку години игра на фантастично ниво.
