Пари Сен Жермен доживеа убедлив пораз (4-1) на гостувањето кај Њукасл во второто коло од Лигата на шампионите. Многумина го обвинуваат тренерот на ПСЖ, Луис Енрике, и неговата одлука да стартува со дури четворица напаѓачи во првиот тим, Килијан Мбапе, Осман Дембеле, Гонсало Рамош и Рандал Коло Муани.
„Дрскоста да дојде на „Сент Џејмс Парк“ со четворица напаѓачи и двајца играчи од средниот ред во тимот не даде ефект. Најизненадувачки е што тој не промени ништо во првичните планови и покрај огромните тешкотии на тимот на средината на теренот“, пишува „Л’Екип“.
На критиките на Енрике се придружи и „Ле Паризиен“, кој го нарече Шпанецот „главен виновник за фијаското“.
„ПСЖ не направи ништо, не постигна ништо, а страдаше во текот на целиот натпревар“, коментира овој медиум.
„Јас сум тренерот, јас одлучувам и јас сум на крајот одговорен за резултатот. Не заслуживме да загубиме толку. Нашата цел е да се пласираме во осминафиналето, групата е тешка, свесни сме тоа, но сепак сме втори“, изјави Енрике по натпреварот.
„Последните натпревари ќе бидат интересни. Системот? Мислев дека е најдобро за овој тим и сѐ уште мислам така. Резултатот е неправеден, но таков е фудбалот. Честитки за Њукасл, но резултатот е нереално висок”.
