Без победник заврши лондонското дерби на „Стемфорд Бриџ“, Челси го пречека Арсенал, а мечот заврши 1-1. Домаќините беа подобриот тим во првиот дел, но сè се промени кога Каиседо доби црвен картон во првото полувреме. По исклучувањето, шансите се редеа на двете страни, а поделбата на бодовите се покажа како најреален исход.
Во првите 30 минути немаше сериозни шанси, иако Челси имаше иницијатива. Еден од поинтересните моменти во првиот дел беше ударот на Енцо Фернандез, кој го одбрани голманот Раја без проблеми.
Во 34. минута дојде клучниот момент – Каиседо стартуваше на Мерино, а по проверката во ВАР-собата, судијата Тејлор му покажа црвен картон на играчот на Челси. Среќа беше што Мерино помина без сериозна повреда, бидејќи стартот на Каиседо беше значително груб.
Во првата минута од надополнувањето, Роберт Санчез со извонредна интервенција го одбрани ударот на Мартинели по опасен противнапад на Арсенал.
Во второто полувреме, Раја ја одбрани првата сериозна шанса на Жоао Педро, но Челси прв постигна гол по корнерот изведен од Рис Џејмс, а највисок во скокот беше Чалоба, кој ја смести топката во „мала мрежа“.
Арсенал брзо изедначи. Букајо Сака се проби од десната страна, центрираше со левата нога, а Мерино беше на вистинското место и постигна погодок.
Во 78. минута Лијам Делап се закани, но Раја повторно одбрани. Арсенал, и покрај играч повеќе на теренот, не успеа да создаде сериозна шанса.
