Милан се искачи на првата позиција во Серија А, откако во дербито од 13. коло на „Сан Сиро“ го совлада Лацио со 1-0, во меч исполнет со силна тактичка борба, но и голема тензија.
Во почетните 45 минути двата тима играа внимателно, без прекумерни ризици и со фокус на добро организирана дефанзива. Милан, што е необично за нивната форма под водство на Масимилијано Алегри, не упати ниту еден удар во рамките на голот на Лацио. Гостите беа поофанзивни на стартот – уште во втората минута Марио Хила шутираше, но Мањан лесно го одбрани неговиот обид. Најдобрата можност за „росонерите“ во првиот дел ја имаше Фофана, но неговиот удар заврши покрај стативата.
Во второто полувреме Милан значително го подигна темпото. Само шест минути по паузата, во 51. минута, Рафаел Леао ја казни првата сериозна грешка во одбраната на Лацио, одлично реагирајќи на прецизниот центаршут на Томори. Португалецот го насочи ударот незадржливо за Проведел и донесе водство во момент кога Лацио изгледаше стабилен.
Леао продолжи да претставува постојана закана и десетина минути подоцна имаше уште една добра шанса, но без завршница. Тоа речиси се одмазди, бидејќи во 71. минута Кастељанос имаше извонредна можност за израмнување, но Мењан со бравурозна реакција го спречи голот кој делуваше неизбежно. Натпреварот потоа се отвори, па во 84. минута Тома Башиќ се закани со силен удар, но повторно францускиот голман беше на ниво. На другата страна Павловиќ упати удар кон голот на Милан, но Проведел без проблем го скроти.
Најголем притисок се создаде во судиското продолжение, кога топката го погоди Павловиќ во раката. По интервенција на ВАР, судијата ја прегледа ситуацијата, а во меѓувреме Алегри доби црвен картон поради бурен протест. По неколку минути неизвесност, беше утврдено дека српскиот дефанзивец претходно бил повлечен, па не стануваше збор за намерно играње со рака ниту за казнен удар.
Милан со оваа победа се искачи на врвот на табелата и продолжи со одличниот тек на сезоната.
