ФК Пелистер одржа свечена академија по повод 80 години од постоењето (ФОТО)

Во чест на големиот јубилеј — 80 години постоење на ФК Пелистер, во Битола се одржа свечена академија исполнета со емоции, спомени и гордост за осум децении богата фудбалска историја.

Оваа година, клубот од под Пелистер ја одбележува и 50-годишнината од „златната генерација“, која во 1974 година го постигна најголемиот успех дотогаш, со историскиот пласман во Втората југословенска лига. Таа генерација остави длабока трага во фудбалската историја на градот, а неколкумина од нејзините легенди беа посебно одликувани за својот придонес.

На свеченоста во Офицерскиот дом, Петар Упалевски и Спасе Ристевски, поранешни асови на Пелистер, добија награди за животно дело и за нивниот нераскинлив допринос кон клубот.

Признанија беа доделени и на други личности кои оставиле длабок белег во историјата на „зелено-белите“, меѓу кои Драганчо Димитровски и Бруно Пресилски.

Пресилски останува запаметен како стрелец на првиот гол во независна Македонија, постигнат на 23 август 1992 година, во триумфот над Рудар со 5-0 — момент кој засекогаш ќе остане дел од македонската фудбалска историја.
Димитровски, пак, е најдобриот стрелец во прволигашката историја на Пелистер, а признанието во негова чест го прими неговиот син Дарко.

Свечената академија беше вистинска ретроспектива на славното минато на клубот — вечер во која се славеше традицијата, љубовта и верноста кон зелено-белите бои.