Младата ѕвезда на Барселона, Ламин Јамал, денеска официјално го продолжи својот договор со клубот до 2031 година. Како што се очекуваше, новиот „дил“ беше потпишан во клупските простории во присуство на претседателот Жоан Лапорта, првиот потпретседател Рафа Јуста и спортскиот директор Деко.
„Иднината е сега“ – објави Барселона на социјалните мрежи со фотографија од потпишувањето.
Јамал, кој има само 17 години, е производ на школата на Барса и дебитираше за првиот тим во 2023 година. Досега има одиграно 106 натпревари, постигнато 25 голови и запишано 34 асистенции.
Тој одигра клучна улога во освојувањето на Европското првенство со Шпанија минатото лето, а потоа имаше блескавата сезона со Барселона, која заврши со освоени три домашни титули.
„Ајде да танцуваме. До 2031“ – додаде клубот во уште една објава на „X“.
Според „Ел Паис“, Јамал со новиот договор ќе добие трикратно зголемување на платата, со годишна заработка од 15 милиони евра, која со бонуси може да достигне и до 20 милиони евра.
Клубот на социјалните мрежи напиша:
„Сегашност. Иднина. Ламин Јамал.“
