Ливерпул се претвори во сцена на хаос и страв, откако автомобил удри во толпа граѓани што присуствуваа на победничката парада на новиот англиски шампион. Во инцидентот, што се случи вчера доцна попладне, повредени се речиси 50 лица, од кои 27 се хоспитализирани. Меѓу нив има и две лица во критична состојба, вклучително и дете.
На прес-конференција одржана синоќа, заменик-началничката на полицијата во Ливерпул, Џени Симс, потврди дека е уапсен 53-годишен маж од Ливерпул, за кој постои основано сомневање дека го управувал возилото. Таа изјави дека истрагата е во тек, а полицијата засега не го третира случајот како терористички напад, туку како изолиран инцидент.
„Работиме на тоа да откриеме како точно дошло до оваа трагедија. Засега нема индикации дека станува збор за планиран напад“, изјави Симс.
И покрај тоа што биле преземени значајни безбедносни мерки за време на парадата, останува нејасно како возилото успеало да се пробие низ полициските барикади и да влезе меѓу навивачите.
Дејвид Кичен, претставник на службата за итна медицинска помош, информираше дека 27 лица се префрлени во болници, вклучувајќи четири деца. Две лица, меѓу кои и дете, се во животно загрозувачка состојба. Сепак, среќна околност е што нема потврдени жртви на самото место.
Уште 20 лица побарале медицинска помош на самата локација, но нивните повреди не барале болнички третман.
