Последниот танц на Тони Крос со специјални копачки: Испишани се имињата на сопругата, децата и кучињата (ФОТО)

Легендата на Реал Мадрид, Тони Крос, ќе го одигра последниот натпревар за клубот во вечерашното финале во Лигата на шампионите. Германецот пред неколку дена ја објави својата одлука летово да ја заврши кариерата.

За специјалниот проштален натпревар со тимот на „кралевите“, Крос избра специјални копачки со кои ќе истрча на теренот на „Вембли“. Тие се главно во бело како бојата на дресовите на Реал Мадрид, но со златни детали.

Најважно за фудбалерот е што на копачките се испишани имињата на неговите најблиски луѓе – неговата сопруга Џеси и нивните три деца Леон, Ами (Амели) и Фин. Интересно е што и имињата на децата се напишани рачно со пенкало, што сугерира дека тоа го правеле лично децата за нивниот татко.

На копачките има место дури и за имињата на двете кучиња од семејството – Ленокс и Џулиус.

Одделно, видливо е логото на Лигата на шампионите, како и германското знаме.
По финалето во Лондон, на Крос ќе му преостане само да одигра и за репрезентацијата на Германија на Европското првенство, и потоа да стави конечен крај на кариерата.