Селекцијата на Малта утре е следниот противник на македонската фудбалска репрезентација во квалификациите за пласман на Европското првнество во Германија следната година. Сепак, нашите репрезентативци кои во дуелот влегуваат по домашното реми 1-1 против Италија се внимателни во пресрет на сребата со Малтежаните.
– На натпреварот во вторник прво треба да одиграме одговорно, сите да го дадеме максимумот, затоа што Малта не е наивен противник, има доста квалитет и не треба да се потцени. Со максимален пристап и однос, треба да излеземе и да се обидеме да победиме. Со Италија беше друг натпревар, нели, се работи за квалитетен противник против кој мораш да одиграш подефанзивно. Но, утре ако сакаме да победиме, треба да нападнеме со сите сили – вели репрезентативецот на Македонија, Ѓоко Зајков.
Зајков вели дека нема притисок во репрезентацијата.
– Фаворит во фудбалот во денешно време може да постои само на хартија, не би рекол дека Малта е аутсајдер. Полесно е да играш со Италија можеби од тој психолошки план, притисок. Но, на сите натпревари е исто, нема зошто да имаме притисок против кого било, дали тоа било против Малта или Италија. Едноставно треба да уживаме во фудбалот, и да ги радуваме сите луѓе кои го гледаат – порачува Зајков.
