Дефанзивецот Тијаго Силва ќе се врати во родниот Бразил. 39-годишниот фудбалер ќе му се приклучи на освојувачот на Копа Либертадорес, Флуминенсе, како слободен играч.
Двете страни постигнаа вербален договор, а во наредните недели се очекува соработката да биде официјално потпишана. Силва ќе го напушти Челси на крајот од сезоната кога ќе му истече договорот.
Искусниот одбранбен играч се очекува да потпише со Флуминенсе на две години.
Тијаго Силва беше дел од Челси во изминатите четири сезони, а претходно настапуваше за ПСЖ, Милан, Порто и за Динамо Москва. Тој е младински играч на Флуминенсе, а во својата татковина беше дел и од Хувентуде и РС Фудбал.
