Селекторот на Италија, Лучијано Спалети, е уверен дека неговиот тим сè уште не ги загубил шансите за пласман во полуфиналето на Лигата на нациите. Според него, доколку Италија покаже ист пристап како во првиот натпревар против Германија, има сосема реална можност да замине како победник од гостувањето во Дортмунд.
„Сквадра Аѕура“ го загуби првиот меч во Милано со 1-2, иако доминираше во поголем дел од натпреварот.
„Постојат порази што треба брзо да се заборават, а ова е еден од нив. Во првиот натпревар го прифативме предизвикот да играме офанзивно и да се соочиме еден на еден со фудбалери кои имаат физичка предност. Го направивме тоа со добро изнесување на топката од одбраната и создадовме многу шанси за гол. Во одредени моменти страдавме, но не му дозволивме на противникот премногу можности, освен двата гола кои дојдоа по моменти на невнимание. Направивме сè што беше потребно за да победиме, но не успеавме“, изјави Спалети.
Тој потврди дека за реваншот планира да направи четири промени во составот.
„Ќе се обидеме да влеземе во натпреварот на ист начин од самиот почеток. Убеден сум дека ако покажеме ист став, резултатот ќе биде поинаков. Имаме можност да внесеме повеќе креативност во играта со вклучување на неколку нови фудбалери кои можат да ни помогнат со својата индивидуална класа“, додаде селекторот на Италија.
