По разочарувачката сезона во која Севилја едвај обезбеди опстанок во Ла Лига, и тоа дури во последното коло, раководството на клубот одлучи дека е време за сериозни промени. Првата е ангажман на нов тренер.
Нов кормилар на андалузискиот клуб ќе биде Матијас Алмеида (51), досегашниот предводник на АЕК Атина, кој се очекува наскоро да потпише тригодишен договор.
Алмеида зад себе има богата играчка кариера, а како тренер се истакна уште со враќањето на Ривер Плата во аргентинската елита. Потоа ги предводеше Банфилд, мексиканската Гвадалахара – со која ги освои сите домашни титули и Конкакаф Лигата на шампионите – како и американскиот Сан Хозе. Во последните три години беше на кормилото на АЕК, со кој во првата сезона освои двојна круна.
За Алмеида, „Рамон Санчес Писхуан“ не е непозната адреса – во сезоната 1996/97 играше за Севилја како фудбалер.
Оваа промена доаѓа по нестабилен период за клубот – во последните три сезони, Севилја смени дури седум тренери. Последен кој седеше на клупата беше ветеранот Хоакин Капарос.
