Реал Мадрид вечерва го пречекува Челси во првиот четвртфинален натпревар од Лигата на шампионите. Двата тима имаат силна меѓусебна историја и се среќаваат трета последовна сезона во ЛШ, а интересно, двете се последни освојувачи на трофејот во натпреварувањето. Минатата година Реал Мадрид одигра одличен натпревар во Лондон и победи со 3-1 по хет-трикот на Карим Бензема. Сепак, на реваншот во Мадрид, Челси сериозно го притисна противникот и го доведе натпреварот во продолженија, а на крајот уште еден гол на Бензема го извлече шпанскиот гигант.
Во сезоната 2020/2021, „сините“ го елиминираа „кралскиот клуб“ по победата од 2-0 на „Стемфорд Бриџ“ и 1-1 во реваншот, на крајот триумфирајќи во Лигата на шампионите. Така, трендот во последните две сезони беше победникот од пресметката помеѓу Реал и Челси да одлучува и кој ќе го освои најпрестижното европско клупско натпреварување.
Настапот на Реал Мадрид оваа сезона беше контроверзен. Од една страна, на тимот брилијантно му оди во омилениот турнир, Лигата на шампионите, елиминирајќи уште еден англиски гигант во осминафиналето – Ливерпул, по феноменалниот пресврт од 5-2 на „Енфилд“ и победата од 1-0 во вториот меч. „Кралскиот клуб“, исто така, се квалификуваше за финалето на Копа дел Реј со уште една извонредна претстава и победа од 0-4 на „Камп Ноу“ над големиот ривал Барселона.
Во исто време, сепак, тимот се лизна во шампионатот, губејќи со 2-3 од Вилјареал на домашен терен и заостанаа од Каталонците дури 13 бода, а титулата во Ла Лига практично е загубена. Покрај поразот, средбата со „жолтата подморница“ ја наруши и скандалот со Феде Валверде, кој по крајот на мечот пред стадионот со тупаници го нападна противничкиот играч Алекс Баена.
Карло Анчелоти остана без повредениот француски лев бек Ферланд Менди, а под знак прашалник со повреда на мускулот е и Давид Алаба. Се очекува италијанскиот тренер да се држи до својата омилена формација 4-3-3 со Куртоа на голот, одбранбените играчи пред него најверојатно ќе бидат Карвахал, Едер Милитао, екс-играчот на Челси, Рудигер и Камавинга на позицијата лев бек. Во средината конците ќе ги влечат ветераните Модриќ и Крос заедно со Чуамени, а во нападот ќе биде Феде Валверде, заедно со Карим Бензема и Винисиус Жуниор.
Досегашната сезона на Челsи не може да се дефинира поинаку освен како „неуспех“. „Сините“ од Лондон настапуваат трагично во Премиер-лигата, што логично доведе до нова тренерска смена и менаџерот Грем Потер доби отказ, а на негово место се врати клупската легенда Френк Лампард.
Сепак, тоа не му помогна многу на Челsи, кој со својот нов менаџер загуби со 0-1 на гостувањето кај Вулверхемптон, бидејќи нема победа на четири последовни натпревари во првенството и се наоѓа само на 11. место во поредокот, без ниту една шанса за топ 4.
Тимот одамна е надвор од ФА Купот и Карабао Купот и всушност настапот во Лигата на шампионите е единствената светла точка во сезоната на тимот. Во осминафиналето, Челси ја елиминира Борусија Дортмунд, откако првиот натпревар го загуби со 0-1, а потоа победи со 2-0 во реваншот.
