Пари Сен Жермен повторно е на врвот на Европа, откако го совлада англискиот Тотенхем во Суперкупот на УЕФА. Натпреварот на „Фриули“ во Удине заврши 2-2 во регуларното време, а францускиот тим беше посигурен од белата точка, победувајќи со 4-3 во пенал-серијата.
Првото полувреме започна мирно, без поголеми возбудувања. Иако ПСЖ се очекуваше да го наметне темпото, Тотенхем играше организирано и самоуверено. Во 22. минута, Ричарлисон прв се закани, но Шевалие успеа да одбрани. Лондонскиот тим се повлече, чекајќи шанси од контранапад.
Во 39. минута дојде првиот удар за европскиот шампион – Палиња ја погоди пречката по долг пас од голманот Викарио, а на одбиената топка реагираше Мики Ван Де Вен за водство од 0-1. До паузата, резултатот остана непроменет.
Само три минути по почетокот на второто полувреме, капитенот Кристијан Ромеро ја зголеми предноста на 0-2, казнувајќи ја несигурната интервенција на голманот на ПСЖ.
Луис Енрике одговори со офанзивни измени, вклучувајќи ги Ли Канг-Ин и Ибрахим Мбаје. Притисокот се исплатеше во 86. минута, кога Ли намали на 1-2. Драмата достигна врв во 94. минута, кога Гонзало Рамош со глава го израмни резултатот на 2-2 и го однесе натпреварот во пенали.
Во пенал-рулетот, ПСЖ покажа повеќе смиреност и ја обезбеди победата со 4-3, освојувајќи го уште еден престижен трофеј во својата историја.
