Новите детали за смртта на легендата Диего Марадона предизвикаа шок. Марадона почина во ноември 2020 година поради срцев удар, додека се опоравуваше од операција. Неодамна започна судење против седум члена од неговиот медицински тим, кое ќе трае неколку месеци.
Лекарот Колин Кемпбел, кој беше сосед на Марадона, сведочи дека во ноќта на смртта немало дефибрилатор или други неопходни медицински уреди во куќата на Марадона.
„Куќата беше нечиста, особено собата каде што Марадона се наоѓаше, без основни хигиенски услови или медицинска опрема. Марадона беше мртов повеќе од два часа, а во неговата соба немаше ништо што би помогнало за реанимација – ниту кислород, ниту дефибрилатор“, изјави тој.
Ова сведоштво го потврди и лекарот Хуан Карлос Пинто, кој пристигна како дел од итната помош. Смртта на Марадона длабоко ја потресе Аргентина.
Судењето вклучува повеќе од 100 сведоци, а обвинетите може да се соочат со затворски казни од 8 до 25 години ако бидат прогласени за виновни. Медицинската сестра Дахиани Мадрид ќе се соочи со посебно судење во јули.
Пред десет дена исто така излегоа детали за смртта на Марадона. Тогаш беше одржана првата сесија во судот против медицинскиот тим во Буенос Аирес, каде што обвинителот Патрицио Ферари предизвика голем шок меѓу присутните. Обвинителот покажа слика на Марадона во моментот на смртта, што предизвика силни емоции меѓу семејството и присутните.
„На ваков начин почина Марадона“, рече Ферари додека ја држеше сликата високо, истакнувајќи дека тешката здравствена состојба на Марадона беше очигледна и дека никој од обвинетите не може да тврди дека не беше свесен за состојбата во која се наоѓаше тој.
Неговите ќерки Далма и Џијанина почнаа да плачат, а подоцна нив ги утеша сестрата Јана. Драматичната сцена беше емитирана во живо на каналот на Врховниот суд на провинцијата Буенос Аирес на јутјуб и брзо се сподели преку социјалните мрежи.
