На фудбалските клубови во Шпанија веќе не им е дозволено да носат реклами за обложување и коцкање на своите дресови, а пет прволигаши се уште не успеаја да најдат заменски спонзор, иако се одиграа три кола од новата сезона.
Реал Сосиедад, Алавес, Кадиз, Гранада и Мајорка влегоа во новата сезона со дресови без имињата на спонзорите испишани на нив. Фудбалерите на Кадиз, клуб од југот на Шпанија, истрчаа за последен пат во саботата во жолти маици на кои пишуваше „Дафабет“, која е обложувалница од Филипините.
„Баравме легален начин да го задржиме името на тој спонзор, но сепак ќе треба да најдеме заменски спонзор. Претпоставувам дека ќе успееме да го најдеме “, велат од раководството на Кадиз, кој добиваше околу два милиони евра годишно од „Дафабет“.
Во ноември 2020 година, шпанската левичарска влада донесе закон со кој се дозволува реклами за обложување преку интернет да се емитуваат само од 1 до 17 часот. Никогаш нема да се прикажуваат на телевизија или радио, и им е забрането рекламирање преку спортот.
Ла Лига, телото кое го организира натшреварувањето во двете најквалитетни шпански првенства, првата и втората фудбалска лига, тврди дека 32 од 42 професионални клубови имаат покровители од секторот за обложување и коцкање. Еден од спонзорите на Реал Мадрид, иако не беше истакнат на предниот дел од дресот, беше букмејкерот „Кодере“ претходните години.
„Да се имаат толку многу фудбалери што рекламираат обложувалници или да носат дресови со име на обложувалници, а со тоа и да ги поканат најмладите да се обложуваат, не е добра порака. Ова не е лигата што ја сакаме “, рече Микел Арана, директор задолжен за регулирање на игрите на среќа во Шпанија.
Ла Лига поднесе жалба до Врховниот суд и тврди дека поради новиот закон, клубовите заедно ќе останат без 90 милиони евра само оваа година, во време кога стадионите се делумно затворени поради пандемијата на коронавирусот.
