Македонскиот национален тим од денеска го стартуваше официјалниот делод подготовките за претстојните две квалификациски средби за ЕВРО 2020, против Полска (7. јуни, 20:45) и Австрија (10. јуни, 20:45) на Националната арена „Тодор Проески“ во Скопје. Селекторот Игор Ангеловски не го криеше задоволството што повредените играчи ги надминаа здравствените проблеми и му се ставија на располагање, најавувајќи дека Македонија има потенцијал да ги изненади фаворитите во групата.
„Многупати досега сум потенцирал дека е задоволство да се работи со вакви фудбалери. Крај на сезона е, неколкумина повредени, сите на работ на исцеденост и дадоа сѐ за да бидат подготвени за Македонија. Тоа само покажува за какви фудбалери се работи. Тоа ја покажува љубовта кон дресот и кон Македонија. Целта ја остваривме за првиот дел од подготовките. Тие што имаа повреди ги ставивме на максимум и сега комплетирани може сите да тренираме. Успешно се санирани повредите кај фудбалерите, па сега сакам само да не одминат тие повреди и комплетни да играме и со Полска и со Австрија после тоа. Со сиот респект кон Полска и кон Австрија, но во Скопје паѓале и поголеми репрезентации. Јас само се надевам дека со поддршка од публиката која ќе им даде крилја на овие фудбалери, зашто тие тоа го заслужија, уште еднаш ќе ја израдуваме Македонија“, истакна Ангеловски.
Сличен е ставот и на репрезентативецот Бобан Николов, кој смета дека ако Македонија одигра како што знае, успехот нема да изостане.
„Селекторот многупати ни има кажано дека не е важно против кого играме, туку за што играме и како ние ќе одиграме. Ако излеземе на терен и одиграме како што знаеме и умееме, ако ги исполниме сите задачи, мислам дека никој и никое име не може да не исплаши. Ние сами од себе зависиме. Не чекаме дали противникот ќе има лош ден, туку зависиме од тоа како ние ќе одиграме. Се е до нас“, изјави Николов.
