Маркус Рашфорд е решен да го напушти Манчестер Јунајтед и активно бара нов предизвик во кариерата. По минатата сезона која ја мина на позајмица во Астон Вила, каде што имаше солидни настапи, англискиот репрезентативец нема желба да се врати на „Олд Трафорд“, особено поради недовербата во новиот менаџер Рубен Аморим.
Астон Вила не успеа да обезбеди пласман во Лигата на шампионите, а финансиските побарувања на Рашфорд се премногу високи за клубот од Бирмингем да го откупи договорот.
Во моментов, Интер е сериозно заинтересиран за неговите услуги. Италијанскиот гигант, кој доживеа тежок пораз од 0-5 од ПСЖ во финалето на Лигата на шампионите, планира реконструкција на тимот и гледа во Рашфорд потенцијално засилување во офанзивата.
Се разгледува опција тој најпрво да дојде на позајмица со можност за откуп, а „нероаѕурите“ се подготвени да преговараат за различни структури на договорот со цел да го донесат англискиот напаѓач во Милано.
