Интер се пласира во осминафиналето од Лигата на шампионите откако го победи Плзен со 4-0 на „Џузепе Меаца“ и го осигура второто место во „групата на смртта“ од која испаѓа Барселона. Уште пред вечерашниот меч со Баерн Минхен, каталонскиот тим нема веќе шанси за пласман во нокаут фазата од ЛШ.
Хенрик Мхитарјан со удар со глава погоди и го отвори резултатот во 35.минута, а пред крајот на првиот дел Един Џеко зголеми на 2-0. Босанскиот интернационалец беше стрелец и на третиот гол, а потоа шанса доби и опоравениот Ромелу Лукаку, кој постигна погодок за конечни 4-0 во 87.минута.
Порто на убедлив начин ја освои Белгија победувајќи против Клуб Бриж со 0-4. Белгискиот тим е веќе во осминафиналето, па малку и се опушти, а тоа го искористија Португалците. Двоен стрелец беше Тареми, а во листата се запишаа и Еванилсон и Еустакио. Покрај ова, за одбележување се и одбраните на голманот на Порто, Диого Коста. Тој двапати одбрани пенал. Во првиот обид на Ванакен, но судијата го повтори изведувањето, а потоа го одбрани и шутот на Ланг.
