Тренерот на Наполи, Антонио Конте, неочекувано си земал неколку дена одмор за време на паузата за националните тимови, пренесуваат италијанските медиуми. Тој ќе помине време со семејството во Торино, додека тренинзите на тимот се доверени на неговиот помошник Кристијан Стелини.
Официјалното соопштение на Наполи посочува дека станува збор за тридневно отсуство на тренерот, „претходно планирано и усогласено со клубот“. Сепак, оваа вест привлече внимание бидејќи доаѓа по експлозијата на Конте кон тимот по поразот од Болоња со 0-2, и откако претседателот Аурелио де Лаурентис мораше да објави долг пост на социјалните мрежи за да ги демантира шпекулациите за евентуална оставка на тренерот.
И покрај обидите на Де Лаурентис, тензијата меѓу него и Конте сè уште постои. Во последните денови клубот јасно истакнува дека сите го поддржуваат Конте. Сега, на тренерот и на играчите им преостанува да ја обноват хармонијата и желбата за заедничка борба, кои недостасуваа на почетокот од сезоната.
Следниот период ќе биде исклучително тежок за Наполи, во шампионатот ги очекуваат натпревари против Аталанта, Рома и Јувентус, во Лигата на шампиони – против Карабах и Бенфика, а меѓу нив е и дуелот за Купот на Италија против Калјари.
Конте се очекува да се врати во Неапол на 17 ноември (понеделник), кога постепено ќе почнат да се враќаат и сите репрезентативци.
