Раководството на Ливерпул ја испратило својата прва официјална понуда за Флоријан Вирц до Баер Леверкузен. Понудата изнесува 100 милиони евра плус дополнителни бонуси, а раководствата на двата тима ќе седнат на маса следната недела за да ги разгледаат деталите на договорот.
Од „Енфилд“ сакаат што побрзо да ја завршат зделката за Германецот, со цел да избегнат непријатни изненадувања и евентуална појава на друг клуб кој би можел да ја зголеми цената на фудбалерот и да предизвика натпревар во наддавање.
Уште пред неколку дена се појавија информации дека Манчестер Сити се повлекол од трката за потписот на Флоријан Вирц, додека Баерн Минхен признал дека играчот ги одбил, што практично го остава Ливерпул како голем фаворит за неговиот потпис. Самиот играч се проценува на околу 140 милиони евра.
Во завршената сезона, Вирц имаше импресивна статистика со 16 голови и 15 асистенции на 45 натпревари во сите натпреварувања за Баер Леверкузен.
