Реал Мадрид е вториот финалист во Лигата на шампионите и ќе го предизвика Ливерпул во Париз. „Кралот“ покажа дека никогаш не е „мртов’, тимот на Карло Анчелоти направи уште една неверојатна магија, кога тоа никој не го очекуваше, победувајќи го Манчестер Сити по продолженија со 3-1 на „Сантијаго Бернабеу“.
До 90.минута Манчестер Сити водеше со 0-1 во Мадрид, имаше два гола предност заедно со водството (4-3) од „Итихад“, но тогаш младиот Бразилец Родриго излезе од сенката и постигна два експресни гола, за 2-1, обезбедувајќи продолженија.
На почетокот на првото продолжение, Карим Бензема изнуди пенал и го реализира, за конечен нокаут на „граѓаните“. До крајот, голема борба, и уште една магична победа на „кралскиот клуб“.
На 28 мај во Париз, Реал Мадрид ќе игра против Ливерпул во реприза од финалето на ЛШ во 2018 година.
