Реал Мадрид веќе го одредил новиот сопственик на дресот со број 10, кој од 2017 година го носеше хрватската фудбалска икона Лука Модриќ. Според ексклузивни информации на „Ел Чирингито“, „десетката“ од следната сезона ќе му припаѓа на Килијан Мбапе.
Модриќ ќе го напушти клубот по завршувањето на Светското клупско првенство (14 јуни – 13 јули), а со тоа ќе ја отстапи и славната бројка која ја носеше седум сезони. „Марка“, шпанскиот весник близок до клубот, неодамна го прогласи Модриќ за најдобрата „десетка“ во историјата на Реал Мадрид.
Последниот танц на Модриќ со Реал – Светското клупско првенство
Килијан Мбапе веќе во својата дебитантска сезона на „Сантијаго Бернабеу“ имаше фантастично влијание – настапи на 55 натпревари, постигна 42 голови и запиша четири асистенции. Тој е најдобар стрелец во Ла Лига со 31 гол на 34 меча и веќе ја освои „Златната копачка“ на Европа.
Сезонава играше со број „9“, но од летово ќе ја добие честа да го носи дресот што го носеле некои од најголемите имиња во историјата на Реал.
Модриќ, кој во средината на јули ќе го напушти клубот, е рекордер по бројот на освоени трофеи во дресот на „кралскиот клуб“. Претстојното Светско клупско првенство во САД ќе биде негова последна шанса да го подигне својот 29. трофеј со Реал Мадрид.
