Јувентус успеа да обезбеди пласман во Лигата на шампионите за следната сезона, откако во драматично последно коло од Серија А славеше со 2-3 на гостувањето кај Венеција. „Старата дама“ сезоната ја заврши со 70 бодa, еден повеќе од Рома, која остана на петтата позиција и ќе игра во Лига Европа.
Мечот во Венеција беше полн со возбудувања. Кенан Јилдиз и Рандал Коло Муани ги постигнаа првите два гола за Јувентус, додека за домаќините стрелаа Даниел Фила и Риџечиано Хапс.
Решавачкиот гол го постигна Мануел Локатели од пенал во 73. минута.
Рома, и покрај победата со 0-2 на гостувањето кај Торино, остана без билет за Лигата на шампионите. Леандро Паредес од пенал и Алексис Салемакерс беа стрелци за римјаните.
Во останатите натпревари од последното коло, Лацио загуби дома од Лече со 0-1, Аталанта беше поразена во Бергамо од Парма со 2-3, а Фиорентина славеше на гостински терен против Удинезе со 2-3.
