Шкендија во второто коло од новата сезона во Прва МФЛ има гостување во Скопје, во Ѓорче Петров на екипата на Македонија ЃП. Ова е прв гостински меч за првакот во новата сезона, откако првиот меч во новиот шампионат го реши во своја корист со убедливата победа над Шкупи од 5-1. Тетовскиот тим во овој натпревар влегува после поразот и елиминацијата од Карабах во третото квалификациско коло во Лигата на шампионите, но најдобриот стрелец на Шкендија, Бесарт Ибраими вели дека сега тимот е целосно фокусиран кон овој натпревар и кон целта да се дојде до победа.
„Заморот е тука и има влијание врз нашите настапи. Сепак, треба да бидеме многу искрени прво со себе, а потоа и со другите. Сите знаеме дека Шкендија веќе направи нешто многу големо и ние ќе бидеме во групна фаза во Европа. Истовремено, знаеме дека само преку првенството се обезбедува излез во Европа и поради таа причина првенството треба да се почитува максимално. Работевме на рехабилитација и верувам дека ќе бидеме во најдобрата верзија. За нас секој натпревар е тежок, бидејќи противниците против нас даваат 200% и поради тоа мора да бидеме максимално внимателни. Ова е само второ коло и не е дека многу го познаваме противникот, но од анализите на стручниот штаб мислам дека знаеме што да очекуваме. Најважно е да излеземе на терен за да ја играме нашата игра и задачите кои ќе ни бидат дадени, со верба дека ќе излеземе со посакуваниот резултат“, изјави Ибраими за официјалниот сајт на ФФМ.
Напаѓачот на Шкендија очекува екипата да остане обединета и да прикаже континуитет на добри резултати во Прва МФЛ.
„Веќе реков дека имаме испишано историја, иако сакаме да се обидеме и против Лудогорец да обезбедиме пласман во Лигата на Европа. Сепак, за тие мечеви ќе размислуваме кога ќе дојде време. Сега сме максимално фокусирани кон Македонија Ѓ.П. Најважно е да останеме обединети, за да имаме континуитет на добри настапи. Затоа во овој момент најважен натпреварот со Македонија Ѓ.П.“, вели голгетерот на тетовскиот клуб.
Мечот меѓу Македонија ЃП и Шкендија се игра денеска со почеток во 17 часот на стадионот во Ѓорче Петров, а во ист термин на Националната Арена Тодор Проески се среќаваат Работнички и Башкими.
