Манчестер Сити победи со 1-3 на гости против Јанг Бојс во Берн во третото коло од Лигата на шампионите. Европскиот и англискиот шампион поведе со голот на Мануел Аканџи во 48. минута, а четири минути подоцна израмни Мешак Елија. Натпреварот го реши Ерлинг Халанд, кој погоди од пенал во 67. за ново водство на Сити. Норвешкиот напаѓач во 86. минута погоди за конечни 1-3.
Тоа беа први голови за Халанд во Лигата на шампионите оваа сезона, а вкупно 11. гол во 13. настап сезонава во сите натпреварувања за тимот на Пеп Гвардиола.
Шпанскиот стручњак по натпреварот даде интересен коментар за Халанд.
„Луѓето сега очекуваат тој да постигнува четири гола на секој натпревар. Луѓето сакаат тој да не успее. Жал ми е, но тој ќе дава голови цел живот, тој е неверојатна опасност. Важно е да влегува во шанси. Тој веќе постигна многу голови во Премиер – лигата, повеќе од многу други кои добиваат многу комплименти“, изјави Гвардиола.
Манчестер Сити е лидер во групата од Лигата на шампионите и е на дофат на осминафиналето.
