Капитенот на Манчестер Јунајтед, Бруно Фернандеш, ја одбил мега понудата од Ал-Хилал, објави ексклузивно италијанскиот трансфер експерт Фабрицио Романо. Португалскиот плејмејкер сепак одлучил да остане во Европа и да продолжи да игра на највисоко ниво.
Според различни иформации во медиумите, саудискиот клуб понудил неверојатни 700.000 фунти неделна плата и бил подготвен да понуди над 100 милиони фунти на „црвените ѓаволи“ за неговите услуги.
Ал-Хилал дури поставил и ултиматум до Бруно Фернандеш, но тој сепак одбрал да остане.
Фернандеш неколкупати изјави по завршувањето на исклучително слабата сезона за 20-кратниот англиски шампион дека би заминал од „Олд Трафорд“ само доколку од клубот му дадат јасно до знаење дека не е посакуван. Манчестер Јунајтед беше јасен во ставот дека сака да го задржи, а оваа позиција јавно ја потврди и тренерот Рубен Аморим.
Бруно Фернандеш ја разгледал ситуацијата заедно со своето семејство, но на крајот донел одлука да ја одбие понудата од Ал-Хилал.
