Српскиот напаѓач Александар Митровиќ би можел да се врати во Премиер – лигата ова лето, откако Манчестер Јунајтед сериозно го разгледува неговиот ангажман. Според информациите на „Talksport“, англискиот гигант е подготвен да понуди околу 40 милиони фунти за напаѓачот на Ал-Хилал.
Митровиќ има важечки договор со клубот од Саудиска Арабија до јуни 2026 година, но самиот фудбалер наводно е подготвен да прифати и пониска плата за да се врати на Островот. Тој веќе има значително искуство во англискиот фудбал, каде што настапуваше за Њукасл и Фулам.
Од неговото доаѓање во Ал-Хилал во август 2023 година, Митровиќ одигра 77 натпревари и постигна дури 68 погодоци, вклучувајќи и 19 гола на 23 натпревари оваа сезона во саудиската Про лига.
Манчестер Јунајтед е во потрага по нов напаѓач по неубедливата сезона и проблемите со ефикасноста во нападот. Расмус Хојлунд сè уште не ја достигна очекуваната форма, а се очекува новиот менаџер Рубен Аморим да внесе свежина во тимот со неколку засилувања. Митровиќ се гледа како искусно решение кое би можело веднаш да донесе голови и резултати.
