Струга Трим Лум стигна до плеј-офот во Конференциската лига, но се сопна на последната пречка пред пласманот во групната фаза. Исландскиот Брејдаблик ги сопре стружани и ја грабна историјата, а тимот на Шпетим Дуро мораше да се задоволи и со ова достигнување кое за клубот секако е историски успех.
Искусниот напаѓач Бесарт Ибраими вели дека е време Струга ТЛ да се фокусира на домашните обрски.
„Имавме прекрасно патување низ Европа, задоволство е да се биде дел од најславната историја на Струга Трим Лум. Бевме многу блиску до групите од Конференциската лига, но фудбалот е таков, не успеавме и покрај големата желба да одиме понатаму. Сега целиот наш фокус ќе биде на домашното првенство, каде денеска нѐ очекува натпреварот против Тиквеш. Се надевам дека заедно со остатокот од тимот ќе го дадеме максимумот, со надеж дека трите бода ќе останат во Струга“, изјави Бесарт Ибраими.
„Нормално, европските натпревари се на сосема друго ниво, но сега се враќаме на реалноста, домашниот фудбал, каде што треба целосно да се фокусираме и да го дадеме максимумот од себе, со надеж и увереност дека можеме да го повториме ланскиот успех“, дополни искусниот голгетер.
Со денешниот натпревар меѓу Струга ТЛ и Тиквеш (16 часот) се заокружува 6.коло од Првата фудбалска лига.
