Германскиот шампион Баерн Минхен покажал сериозен интерес за дефанзивецот на Кристал Палас, Марк Гуехи. Според медиумите на Островот, претставници на баварскиот гигант пристигнале во Англија за да започнат преговори околу потенцијален трансфер на 24-годишниот стопер.
Гуехи има важечки договор со лондонскиот клуб до летото 2026 година, но засега одбива да го продолжи. Тоа ја отвора можноста Кристал Палас да го продаде уште ова лето, со цел да избегне да го загуби без обештетување. Покрај интересот од Баерн, англиски клубови како Њукасл и Тотенхем исто така внимателно ја следат неговата ситуација.
Во тековната сезона, Гуехи настапи на 44 натпревари во сите конкуренции, постигнувајќи три гола и запишувајќи две асистенции. Тој неодамна го освои и ФА Купот со Кристал Палас. Вредноста на стоперот се проценува на околу 45 милиони евра.
Баерн е решен да ја засили својата одбрана и веќе го потврди трансферот на германскиот репрезентативец Џонатан Тах од Баер Леверкузен. Постои и можност за заминување на Јужнокореецот Ким Мин-Јае, а Гуехи се гледа како потенцијален наследник во срцето на одбраната.
Интересно е што Баерн и минатата година купи играч од Кристал Палас, Мајкл Олисе, а сега на радарот на Венсан Компани и неговиот стручен штаб се наоѓа и креативецот Еберечи Езе.
