Домот на претседателот на Пари Сен Жермен, Насер Ал-Хелаифи, бил претресен во средата навечер поради наводи за киднапирање и тортура во Катар на француско-алжирски лобист, пренесе АФП, повикувајќи се на сопствени извори.
„Судијата побара информации и дополнителен пристап, а сето тоа му беше обезбедено во целосна транспарентност и соработка со властите од самиот почеток“, изјави портпаролот на претседателот на ПСЖ.
Еден од адвокатите на Ал-Хелаифи одби да го коментира случајот.
Претресот го извршила правосудната полиција откако 42-годишниот лобист Тајеб Бенабдерахман поднел жалба на крајот на јануари. Тој се пожали на неговото апсење во јануари 2020 година во Катар, каде што се доселил три месеци претходно.
Тој тврди дека бил малтретиран и испрашуван шест месеци за документите што ги поседувал, а кои го компромитирале шефот на ПСЖ. Нему му беше дозволено да влезе во Катар во ноември 2020 година, откако потпиша договор за необјавување што го спречуваше да ја открие содржината на тие документи.
Минатата недела во врска со оваа афера беше претресена и канцеларијата на градоначалничката на седмиот арондисман во Париз, Рашида Дати, која е поранешен министер.
