Ѕвездата на Рома, Пауло Дибала, е оптимист дека ќе успее да се опорави навреме за почетокот на Светското првенство во Катар, кое започнува на 20 ноември. Аргентинецот заработи повреда на бутиот мускул во победата на „волчицата“ над Лече пред повеќе од една недела. Целосното закрепнување се очекува да трае околу четири седмици.
28-годишниот фудбалер избра терапија за побрзо закрепнување на мускулното ткиво, која во минатото успешно ја користеа спортисти како Рафаел Надал, Коби Брајант и Тајгер Вудс.
Се очекува селекторот на Аргентина, Лионел Скалони, да го вклучи Дибала во прелиминарниот тим за Светското првенство, кој ќе биде пуштен на 14 ноември, а самиот играч се надева дека ќе најде место во финалниот состав кој ќе игра на првенството во Катар.
